Telepresence – atortugissaarluinnarluni ataatsimeeqatigiinneq

TELE-POST-ip atortorissaarutaa nutaaq Telepresence atorlugu Nuummiiginnarsinnaavutit suleqatigisannillu Danmarkimi Hellerup-imiittunik ataatsimeeqatiginnillutit.

Taamaalillutit piffissaq aningaasallu sipaassavatit aammalu avatangiisimik mingutsitsinissaagaluaq pinngitsoortillugu.

Telepresence atorlugu allaanngilaq nerrivimmi issiaqatigiilluni ataatsimeeqatigiiginnarluni. Inuit ataatsimeeqatigisatit isaasigut isigisinnaavatit HD (High Definition) assiliissut ersarilluinnartoq atorlugu. Attuallaannartakkat atorlugit allattukkassinnik saqqummiussassassinnillu paarlaasseqatigiissinnaavusi ataatsimiinnissinnilu ilissinnut toqqaannartumik sianerfigisinnaallusi.

Nipaa eqqarsaatigigaanni full duplex-ip (tassaasup illugiinnut tamanut nipip sukkassusaata assigiinnissaanik qulakkeerinnitsitsisup) aamma spatial audio-p (soorlumi inimeeqatigiiginnartutut nipeqartitsisup) nipi stereo sukkasooq ilanngullugu, nipi pitsaalluinnartoq tusaaneqarsinnaatissavaa.
Init ataatsimiiffiit ataatsimeeqatigiinnerup pitsaassusaanik qaffaallatsitseqataapput. Allaffimmi issiavinni iluarinarluinnartuni ilorrisimaarneq.

Inip telepresence-tut atorneqartup august 2010-mi atorneqalernerani: Ineqarnermut Angallannermullu Naalakkersuisup Jens B. Frederiksen-ip Nuumminngaanniit ilisimatusarnermut ministeri Charlotte Sahl-Madsen København-imiittoq ilassivaa. Assiliisoq: TELE-POST

Ini ataatsimiiffik qisunnik iigalersugaavoq, tungujortumik qalipataalluni qullilersugaallunilu torrallatamik, ataatsimeeqatigiillu pissusivimmissut tredimensionelle-mik isikkoqartillugit. Imaappoq, ataatsimeeqatigiillusi kilometerit tuusintilippassuit ilissinnut qanorluunniit ungasitsigigaluarussi inimi ataatsimi issiaqatigiittutut misigisimassaasi.

Atortorissaarutinut aamma ilaavoq ineerannguaq ataatsimeeqataasut tiitorfigaluguluunniit kaffisorfigisinnaasaat, aammalu internetimut ledningeqanngitsumik attavimmik atuiffigisinnaasaat.