Telefonikkut ataatsimiittarnerit

Telefonikkut ataatsimiittarnerni periutsit marluk neqeroorutigisinnaavagut:

140 – Telefonilerisulerluni telefonikkut ataatsimiinnerit
Telefonilerisulerluni telefonikkut ataatsimiinnerit normu immikkut sullissiviusoq 140 aqqutigalugu inniminnerneqarsinnaapput. Sumiiffinnit ikinnerpaamik pingasunit amerlanerpaamillu 18-init peqataasoqarsinnaavoq.

Inniminniinermi peqataasussat tamarmik aqqi telefoniisalu normui, ulloq ataatsimiiffissaq piffissarlu sullissisumut nalunaarutigineqassapput.

Ataatsimiinnissamik inniminniisoq ataatsimeeqataasussat tamaasa sinnerlugit akiliissaaq. Akigititassap naatsorsornerani sumiiffinni ataatsimeeqataaffiusuni minutsit atorneqartut sumiiffimmi oqaloqateqarnermut akinut atuuttunut amerlisillugit, tassungalu ataatsimiinnissap pilersinneqarneranut akitsuut ilanngullugu naatsorsorneqassapput.

150 – Nammineq toqqaalluni telefonikkut ataatsimiinneq
Nammineq toqqaalluni telefonikkut ataatsimiinneq sukkasuumik ajornanngitsuaqqamillu aaqqinneqarsinnaavoq, taamaaliornissamullu inniminneeqqaartoqartariaqanngilaq.

Ataatsimiinnermi peqataasussat amerlanerpaamik quliut 150-imut sianernerisigut ataatsimiinnissaq aallartinneqarsinnaavoq, tassanilu nipi ataannartoq utaqqineqassaaq, tamatumalu kingorna kisitsisit isissutissat arfineq pingasut, ataatsimiinnissaq sioqqullugu ataatsimiititsisussap ataatsimeeqataasussanut isumaqatigiissutigisimasai peqataasussanit tamanit toortarneqassapput.

Nunani allani sumiiffinniit peqataasoqarsinnaavoq, tassanilu 00 299 150, kiisalu kisitsisit arfineq pingasut, siumoortumik isumaqatigiissutigineqareersimasut toortarneqassapput.

Peqataasut tamarmik Kalaallit Nunaanni nunap iluani ulluunerani akigititaasoq peqataanerminnut akilissavaat.