Kalaallit Nunaanni bredbånd-imut sukkassutsit nunarsuup sinnerani attaveqaateqarnermik it-millu suliffissuaqarnermi sukkassutsinut sukkassuseritinneqartut assigai. Sukkassutsit uuttorneqartarput atuisup aamma TELEp centraliisa akornanni sukkassutsitut. Internetimik nioqqutilimmi attavimmik sukkasuumik pisinermi sukkassuseq naatsorsuutigisaq annerpaaq pissarsiarineqartarpoq, sukkassuseq sukkassusivippiaasoq pinnagu. Sukkassutsip naatsorsuutigisaasup sukkassutsillu naatsorsukkap assigiinngissutaat overhead-eqarnermik pissuteqarpoq.
Overhead
Paasissutissanik nassiussigaangavit tigusaqaraangavillu, sukkassutsip atorneqartup ilaa (20 %) paasissutissat qarasaasiakkut ”poorneqarlutik” nassiunneqarnerinut atorneqartarpoq – tamanna taaneqartarpoq overhead-imik (atunngitsuuineq).
Overhead assersuunneqarsinnaavoq allakkamik nassiussinermut. Allakkap puussaa frimærkilu pisariaqartuupput allakkamik nassiussiniaraanni. ”Allagaq” tamarmiusoq, tassa allakkap puua, frimærki imaalu (allagaq nammineq) akilerneqarlunilu ingerlanneqartarpoq, kisiannili imaa (allagaq nammineq) kisimi atorneqartussaavoq.
Assersuutigalugu assinik kakkiussivigalugu mailimik nassiussiguit, maili koderneqartarpoq, taamaalillutik paasissutissat imarisaasa poorneqarnissaat, nassiunneqarnissaat eqqortumillu ingerlanneqarnissaat qulakkeerneqartarluni. Protocollit pingasuupput tamatuminnga qulakkeerisuusut, tassalu SMTP (Simple Mail Transport Protocol), TCP (Transport Control Protocol) aamma IP (Internet Protocol).
Sukkassutsimik sukkaallisitsineq pinngitsoorneqarsinnaanngilaq
Overhead-ip kingunerisaanik sukkassutsimik sukkaallisitsineq pinngitsoorsinnaanngilaq. Assersuutigalugu illit nammineq toqqarsinnaanngilat e-mailit assinik kakkiussivigisaq ingerlanneqarnermini koderneqassanersoq koderneqassannginnersorluunniit.
Attavimmi sukkassuseq atorluarniassagaanni atuinerit ataatsikkoortut assigiinngitsuusut ingerlanneqartariaqarput, tamannalu pisinnaavoq browser-it arlallit ammatinnerisigut, aallernerit arlallit ingerlatinnerisigut imaluunniit inoqutigiit qarasaasiaminnik arlalinnik ataatsikkut attavimmik atuisinnerisigut.